Amit Shah-a'n Rs 499-a RT-PCR test tih theihna a tlangzarh

Union home minister Amit Shah chuan Thawhṭanni khan New Delhi-a Indian Council of Medical Research (ICMR) headquarters-ah Rs 499 chauh senga Reverse Transcription Polymerase Chain Reaction (RT-PCR) test tih theihna tur mobile labs series hmasa ber a tlangzarh. 

Covid-19 hri kai hriat chhuahna tura RT-PCR test man hi state ṭhenkhatah chuan Rs 2,400 man te a ni a, mahse mobile lab tlang­zarh tak hmang hian Rs 499 chauhin a tih theih dawn a, hei hi mi tam takin an chhawr thei dawn a ni. 

Test report pawh hi sample lak a nih aṭanga darkar ruk chhungin hriat theih a ni dawn bawk. 

SpiceHealth chuan an CEO, Avani Singh kaih­hruaiin RT-PCR tlawm leh awlsam zawka tih a ni theihna atan ram chhung hmun hrang hrangah mobile testing facility hi siam an tum a ni. A thawh khatna atan lab hi 20 siam tum phawt a ni a, a tam zawk hi Delhi-ah dah a ni ang. Heng lab-te hi laksawn zung zung theih an nih dawn avangin khawpui chhungah pawh test mamawh zualna hmunte dah  kual an ni ang. Lab-ah hian nitin sample 1,000 vel test theih tum a ni.

Testing kit leh laboratory facility te hi ICMR in a pawmpui tawh a, mobile laboratory-te hi National Accreditation Board for Testing and Calibration Laboratories (NABL) chuan a pawmpui tawh bawk. 

Ram chhunga testing laboratory leh collection center-ah dah a nih theih nan hian SpiceHealth leh ICMR chuan  thawhdunna tur Memorandum of Under­standing (MoU) an ziak tawh a ni.