Fuel-a VAT lak tihniam tura PM ngenna Eptu Chief Minister-ten an chhang let

Prime minister Narendra Modi-a'n Nilainia state hrang hrangte petrol leh diesel-a Value Added Tax (VAT) an lakte tihniam tura a ngenna leh, BJP ni lo party dang sorkarna state-ten chhiah hi an tihniam lo nia a sawi chungchang chu eptu chief minister-ten an chhang let.

PM Modi chuan Covid chungchanga virtual meeting a neihpuinaah, eptu party rorelna state-ahte VAT tihhniam loh vangin fuel man a sang bik nia sawiin a sawisel a, mipui nawlpuite phurrit chhawkna tura chhiah lak tihniam tur hian Chief Minister-te chu a ngen a ni.

Telangana chief minister, Telangana Rashtra Samithi (TRS) hruaitu K Chandrasekhar Rao chuan PM thusawi hi chhangin, state-te chhiah tihniam tura a ngen chu a zak hle tur a ni tiin, an state-ah kum 2015 aṭang khan fuel tax an lak hi an la tisang lo tih a sawi.

KCR tia hriat lar, CM Rao chuan, "Sorkar laipui zawk chuan state-te ngen loin tax chu engatinge a tihhniam mai loh? Sorkar laipui hian chhiah a tisang zawk zel a, hei hi a sawifiah a ngai zawk a ni," a ti.

West Bengal chief minister Mamata Banerjee pawhin a kaihhruai Trinamool Congress (TMC) sorkar chuan kum thum liam ta chhungin petrol leh diesel man a tihhniamnaah Rs vbc 1,500 zet a seng tih a sawi. "PM Modi chuan awn lam nei lamin thu a sawi a, midangte rilru hruaikawi a tum a ni. A thu tarlante hi a dik lo a, kum thum chhungin petrol leh diesel-ah litre khat Re 1 in kan tihniam zel a, Rs vbc 1,500 kan seng a ni," tiin a sawi. Sorkar laipui aṭangin Rs vbc 97,000 dawn tur an la nei a, hemi zinga a zahve an dawn hnuah petrol leh diesel an tihtlawmna man, Rs vbc 3,000 an pe leh nghal dawn tih a sawi bawk.

Maharashtra chief minister, Shiv Sena hruaitu Uddhav Thackeray chuan ram chhunga fuel man san chungchangah state sorkar-te chu mawhphurtua puh theih an ni lo tih a sawi.

Congress party hruaitu Rahul Gandhi pawhin PM Modi thusawi hi chhangin, Prime Minister chuan fuel man sang chungchangah a mawhphurhna chu thupbo a, state-te mawhpuh a tum tih a sawi a, sorkar laipui chuan fuel tax hi 68% a la mek a ni, a ti. "Fuel man san chhanah state an mawhpuh a, coal indaihlohnaah state an mawhpuh a, oxygen indaihlohnaah state an mawhpuh," tiin a twitter-ah a tarlang.