Galwan valley-a inbeihnaah China sipai 40 chuang an thi

Ladakh khawchhak lam, Galwan valley-a June 15 zana India leh China sipai inbeihnaah khan China sipai 40-45 thi an awm nia sawi a ni. 

Ramria sipaite inbeihna thlengah hian India sipai 20 an thi a, hliam 78 an awm bawk. India Army-te chuan China sipai zingah thi leh hliam eng emaw zat an awm tel niin sawi mah se, hemi chungchang hi China lam chuan engmah a sawichiang lo. 

Mahse India lamin a chhut danin, inbeihna thlengah hian China sipai thi zat chiah hi sawichian theih ni lo mah se thi leh hliam hi 40-45 inkar an awm niin a chhut. Hei bakah hian 3 Medium Regiment te chuan Chinese colonel pakhat an man bawk a, mahse a hnuah an chhuah leh nghal niin an sawi. 

Line of Actual Control (LAC) hrula inbeihna hi kum 45 hnuaa India leh China sipai inbeihna thlenga thi an awm leh hmasak berna a ni a, India leh China ram hi nuclear ralthuam nei ve ve an nih avang hian kha inbeihna thleng kha ram dangten an ngaihven phah hle.