School-ah sakhaw lehkhabu zirtir khap a ni : Karnataka Education Minister

Karnataka primary and secondary education minister BC Nagesh chuan Karnataka Education Act hnuaiah an state chhunga school-ah sakhaw lehkhabu zirtir khap a ni tih a sawi. Hemi rual hian Bhagwad Gita zirtir a nih chungchangah, Bible leh Quran te anga sakhaw lekhabu a nih loh avangin khaikhin theih a ni lo, a ti bawk.

Minister Nagesh chuan sorkara in register school-ah sakhaw lehkhabu leh an zirtirna kalpui khap a ni tih a sawi a, "Isua chanchin leh Kristiante chungchang chu school-a sakhaw hrang hrangte chanchin zirnaah chuan sawi theih a ni. Mahse eng school mahin an zirlaite chu sakhaw bil tihdan leh an sakhaw lehkhabute hi an zirttir tur a ni lo," a ti.

Hetih lai hian school-ah Bhagwad Gita zirtir a nih chungchangah sawifiah nghalin, "Sakhaw lehkhabu a ni lo a, sakhaw tihdan ṭhin chungchang pawh a sawilang lo. Mihringte tana thil zawm tur ṭha a tarlang zawk. Hei vang hian Bible leh Quran lehkhabute nen khaikhin theih a ni lo," tiin a sawi.

Bengaluru-a Kristiante zirna in siam, Clarence High School-ah zirlaite chu Bible keng tur leh, Bible chungchangah exam-te neih luihtir nia complaint awm chu block education officer-te chhui chiang tura hrilh an nih thu Minister chuan a sawi bawk. He complaint hi Hindu group-te thehluh a ni.

Bangalore Archdiocse-a archbishop, Peter Machado chuan Clarence High School laka complaint thehlut hian a rilru a ti na hle tih a sawi a, " He school hi kum 100 zet chu Kristian minority institution a lo ni tawh a, a tir takah pawh Kristian zirlaite tana Kristian school-a din a ni. Tuna zirlai zinga 75% chuang chu Kristian an ni a, Bible study te kan nei ṭhin," a ti. Mahse nikum aṭang khan an kalphung hi an thlak tih sawiin, zirlaite chu eng thil pawh zir turin tumah nawr luih an ni ngai lo, a ti. Tun hnaiah Hindu group-te chuan minority institution-te chu an bitum chho niin a sawi bawk.