Modi-a'n inhlawhfate tana scheme siam a hawng

Prime minister Narendra Modi chuan kar liam ta Inrinni khan state danga inhlawhfaa awm thingtlang mite hna thawh tur siamsakna, 'Garib Kalyan Rojgar Abhiyaan'  scheme thar a hawng. 

He scheme thar hi state paruk Bihar, Uttar Pradesh, Madhya Pradesh, Jharkhand, Odisha leh Rajasthan-a state danga inhlawhfaa haw khawmte tana siam a ni a, heng state-te hian  district 116 a huam pha a ni. District tinah hian inhlawhfa mi 25,000 vel awm ang zela chhut a ni bawk. 

Heng state parukah hian inhlawhfa an tam hle a, he scheme hi ni 125 chhung kalpui tura ruahman a nih bakah he scheme atana pawisa ruahman hi cheng vaibelchhe 50,000 a ni. 

Covid-19 hri leng vangin state danga inhlawh tura awm te chu mahni state-ah an haw khawm mek zel a, an state-ah hian hna thawh tur an hmuh theih nan sorkar laipui chuan scheme thar a ruahman ta a ni, tiin Modi chuan a sawi.