Lungalhthei indaih lohna avangin rel 650 chuang titawp rih dawn

Ram chhunga power plant-ah lungalhthei stock a tlem a, lungalhthei indaih lohna thleng mekah a phurtute chak leh rang zawka an tlan theihna turin India Railways chuan khualzin phur rel 650 chu tihtawp rih a tum.

Railways official-te chuan lungalhthei phurh hna chu chak zawka kalpui turin hma an la dawn a, hei bakah hian power plant-a dahna tura hun sen ṭhin pawh a theih anga hun hman rei loh an tum dawn tih an sawi a ni. Hei vang hian khualzin phur rel 657-te chu tlantir an ni dawn rih lo a, thla hnih chhungin lungalhthei phurtu pawh tihpun an tum bawk.

Indian Railways executive director Gaurav Krishna Bansal chuan, khualzin phur rel ṭhenkhat tihtawp chu boruak a pangngai chhoh leh hunah tlantir leh nghal an ni dawn tih a sawi.

Central Electricity Authority (CEA) daily coal stock report chuan, ram chhunga thermal power station 165 zinga 56-ah chuan coal an stock hi 10% leh a aia tlem a ni a, station 26-ah phei chuan 5% aia tlem chauh an nei tawh tih a tarlang.

Delhi chief minister Arvind Kejriwal chuan India ram pum power dinhmun chu a ṭha lo a, hei vang hian harsatna thleng tur chinfel dan an ngaihtuah ho thuai a ṭul thu a sawi. Delhi power minister Satyendra Jain pawhin power plant pawimawh tak takten coal dahṭhat hi ni 21 daih pawh an nei tawh lo tiin, hei vang hian Delhi khawpuiin power supply lamah harsatna a tawk dawn a, metro service leh sorkar hospital thlengin an buai phah maitheih thu a sawi. Sorkar laipui chu lungalhthei tam zawk pe turin a phut nghal bawk a ni.

Bihar power minister Bijendra Prasad Yadav pawhin lungalhthei indaih lohna vanga power lama harsatna thleng mek chu sawichhuakin, sorkar laipui pawh a biak tawh thu a sawi.

Hetihlai hian UnionPower Ministry lam chuan state-ten lungalhthei supply-na man an pek chhuah loh avangin he harsatna hi awm a ni zawk tiin, power plant-te chuan harsatna an nei lo a, hna an thawk chhunzawm reng a ni, a ti thung.

India rama power plant-ten lungalhthei chhekkhawl an neih hi tun thla tir lam khan 17% dawnin a tlahniam a ni. Nikum khan coal stock tlem vangin state eng emaw zat chuan chawhrualin ni li vel power supply nei loin an lo awm tawh bawk a ni.

India rama electricity siamchhuah zinga 70% hi lungalhthei hmanga siam a ni. Kawng thui tak tak phurh a ngai a, a phurhna a ṭha tawk lo a, hei bakah hian rel kawng lun takah khualzin phur rel tlan a tam avangin lungalhthei phurte hi rei tak tak an dang khawtlai fo bawk.