Hri kai thar 3,377 awm leh

India ramah Covid-19 hri kai thar an pung leh mek. Ningani khan hri kai thar hi 3,377 awmin, hri vanga thi 60 an awm leh bawk.

Union health ministry data-in a tarlan danin, ram puma hri kai hmuh chhuah tawh hi 4,30,72,176 an tling tawh a, an zinga 5,23,753-in an thihpui tawh a ni. Nimin zing dar 8 thleng khan hri kai mek, active case hi 17,801 an tling leh tawh a ni.

Ni khata hri kai thar, daily positivity rate hi 0.71% niin, weekly positivity rate hi 0.63% a ni bawk.

Covid-19 vaccine pek hna pawh ngawrh taka kalpui chhunzawm reng a ni a, nimin zing thleng khan dose vaibelchhe 188.65 pek chhuah a ni tawh a ni.

India-ah Covid variant thar hmuh a ni
Patna-a Indira Gandhi Institute of Medical Sciences (IGIMS)-ah Covid Omicron variant thar - BA 12 hmuhchhuah thar a ni a, hei hian India ramah hri a len thar leh hlauhthawnna a siam lian nghal hle.

IGIMS-a microbiology deparmtent HOD, Professor Dr Namrata Kumari chuan Covid hri kai an pun thar leh avangin Omicron variant sample-te chu genome sequencing an ti leh a, sample 13 a enfiah aṭangin pakhat chuan BA.12 strain a neih thu a sawi a, a dang 12-te erawh BA.2 strain vek an ni, a ti.

Mithiamte chuan India rama Covid-19 hri leng thawh thumna a thlen laia hmuh, Omicron BA.2 variant aiin variant hmuh chhuah thar, BA.12 hi a let 10 velin a hlauhawm zawk niin an sawi. Mahse Dr Kumari chuan hlauhthawn tur a awm lo tih sawiin, fimkhur chhunzawm zel erawh a ngai tih a sawi.