Sorkar thurawn angin RBI-in pawisa tih thih a rel

Sorkar laipui chuan Reserve Bank of India hnenah kum 2016 November 7 khan pawisa note lian pahnih, Rs 500 leh Rs 1,000 chungchangah thurawn a pe a, a tuk November 8-ah central bank board chuan pawisa note ti thi tur hian a rel nghal a ni.

RBI-in Parliament Deparment-Related Committee of Finance, Congress hruaitu M Veeerappa Moily-a kaihhruai hnena lehkha a thehluhah hemi chungchang hi a sawilang a ni. RBI chuan sorkar laipui chuan November 7 khan Reserve Bank hnenah black money, pawisa lem leh firfiakte sum chhekkhawl avanga harsatna thleng chungchangte tihkian dan ngaihtuah turin thurawn a pe a, hei vang hian Central Board of Reserve Bank chuan Rs 500 leh Rs 1,000 tithi tur hian a ngaihtuah zui ta a ni, a ti. Sorkarin thurawn a pek tuk, November 8 khan RBI Central Board chu inhmukhawmin, hun rei tak an ngaituah hnuah sorkar laipui hnenah pawisa note sang pahnihte tithi tur hian thurawn a pe ta a ni.

RBI-in thurawn a pek hnuah, Prime Minister Narendra Modi kaihhruaiin union cabinet meeting neih zui a ni a, hemi zan vek hian PM Modi chuan pawisa note hi zanlai aṭanga a thih thu a puang zui bawk.

Central bank chuan ramchhunga thil man sang chho zel avangin kum 2014, October 7 khan sorkar laipuiah Rs 5,000 leh Rs 10,000 note siam a ngaih thu pawh a lo thlen tawh niin a sawi. Kum 2016, May 27 khan bant note series thar, design, size leh color leh theme danglam siam turin alo rawt tawh a, heng zingah hian Rs 2,000 note thar tihchhuah pawh hi a rawt tel a ni.