SP inṭhendarh dawn lo : Mulayam Singh Yadav

Samajwadi Party hotu lu ber, Mulayam Singh Yadav chuan an party mite chu lungrual taka awm turin a fuih. Uttar Pradesh-a rorellai, Samajwadi Party hi tunlaiin party chhunga in­nghirnghona awm avangin an buai hle a, assembly inthlan hmachhawn mai tur an nih avangin an buaina hi chinfel a nih thuai loh chuan inthlanah pawh nghawng a neih len hle rin a ni.

Nimina Lucknow-a party headquarters-a thu a sawiah, Mulayam Singh Yadav chuan Samajwadi Party chak taka kalpui turin mi tam takin theih­tawp an lo chhuah tawh ṭhin tih a sawi. “Samajwadi Party hi nasa taka an beih hnuah din a ni a, party worker-te pawhin hun harsa tak tak an lo paltlang tawh a ni. Emergeny hunlaia jail-a ka tan khan ka fapa Akhilesh chu kum hnih leh a chanve mi chauh a ni”, a ti.

Mulayam chuan assembly inthlan an hmachhawn turah party CM candidate atan a fapa, UP Chief Minister nilai me Akhilesh Yadav chu a ruat thu sawiin, an party inlungrualna turin he thil hi sawibuai zui tawh lo turin a chah bawk. SP chu kehdarh loin, lungrual tak leh chak taka an kal zel a ring tlat tih a saw bawk a, party worker-te chuan inpumkhatna ṭha tak an neih chu an chhawmnung zel dawn a ni, a ti. Party hming leh symbol pawh thlak danglam a ni dawn lo tih a sawi bawk.