Europe ram 3 tlawh turin PM Modi a zin dawn

Prime minister Narandra Modi chu Europe ram pathum - Germany, Denmark leh France tlawh turin vawiin hian a zin chhuak dawn.

PM Modi zin tur chungchanga nimina media briefing a neihah, foreign secretary Vinay Mohan chuan Prime Minister-i'n EU ram pathum hruaitute a kawmnaah energy security chungchang chu an sawi tur pawimawh zingah a tel tih a sawi. Thawhhona ṭha zawk neih chungchangte bakah Ukraine ram dinhmunte pawh an sawi dawn a ni, a ti.

Prime Minister hian vawiin hian Berlin, Germany a pan dawn a, May 3-4 ah Copenhagen, Denmark-ah awmin, a haw lamah Paris, France a tlawh kawi leh dawn a ni. Tun ṭum hi kumin chhunga ram pawn lama PM a zin chhuahna hmasa ber tur a ni.

Berlin-ah hian Germany vice chancellor Olaf Scholz nen 6th India-Germany Inter-Governmental Consultations (IGC) chu an kaihruai dun dawn a, he huna tel tur hian minister pawh eng emaw zat an kal dawn a ni. Modi leh Scholz hian Business Roundtable-ah thu an sawi dawn bawk.

Denmark prime minister Frederiksen meeting a neihpui dawn tih Modi chuan a sawi a, India-Denmark Business Roundtable-ah telin, Denmark rama India mi awmte pawh a hmuh tur thu a sawi. Hei bakah hian 2nd India-Nordic Summit-ah pawh a tel nghal bawk ang. He summit karlakah hian Nordic ram pali dang - Iceland, Finland, Sweden leh Norway hruaitute a hmu dawn a ni.

Paris hi chu a haw kawngah a tlawh kawi zawk dawn a, France president atana thlan nawn, Emmanuel Macron a hmu dawn a, ram pahnihte thawhdunna chungchangte an sawidun dawn tih Modi chuan a sawi.

Ni thum thanga a zin chhung hian PM Modi hian programme 25 zet a nei hman dawn a ni.