Army Chief tharin charge a la

Indian Army hotu thar, general Manoj Pande chuan Inrinni liam ta khan general MM Narvane thlakin, Chief of Army Staff charge a la ta.

General Manoj Pande hi Chief of Army Staff 29-na niin, sipai maktaduai 1.3 chuang hotu atana Corps of Engineer aṭanga officer ruat hmasa ber a ni bawk. He post hi kum hnih a chelh thei dawn a ni. Army chief atana ruat a nih hmain February thla khan vice chief-ah dah a ni.

Nimin khan Army chief thar hi New Delhi-a South Block Lawns-ah guard of honour pek a ni. He hunah hian Navy leh Air Force hotute pawh an tel. Army Chief thar chuan sipaite thuam chak leh thuam changkanna turin ram chhunga siam technology-te hman ṭangkai chu a hmalakna pawimawh tak a ni dawn tih a sawi. Sipaiten eng thilah pawh beihpui an thlak dawna inbuatsaihna ṭha tak neih chu a dah pawimawh ber tur thu a sawi bawk.