Electric vehicle kang chungchang chhui vek a ni dawn : Transport Secretary

Road Transport and Highways Secretary Giridhar Aramane chuan hmun hrang hranga electric two-wheeler kang chungchang chu chhui chian vek a ni dawn tih nimin khan a sawi.

Tun hnaia ram chhung hmun hrang hrangah electric vehicle (EV) kang report a awm fo a, thih phah leh hliam tuar eng emaw zat an awm a ni.

Aramane chuan heng EV kang zawng zawngte a chhan chiang taka chhui vek a ni dawn tih a sawi a, hemi atan hian expert panel din a nih thu a sawi bawk. Design, management, operation, battery leh EV siam chungchanga harsatna awm theite chu chiang taka chhui vek a ni ang, a ti. Hemi hnu hian report thehlutin, rawtna te an thehlut tel nghal dawn tih a sawi bawk.

A hmain road transport and highway minister Nitin Gadkari chuan tun hnaia EV kang thleng fo chungchanga a ngaihdan a lo sawichhuak tawh bawk a, company-te inthlahdah vang a nih chuan hremna pek an nih ngei tur thu te, EV ṭha tawk lo nia hriatte chu koh let tir vek an nih tur thute a sawi.

Pune-a Ola EV kang chungchang chhui turin sorkar chuan thupek a tichhuak tawh a, Centre for Fire Explosive and Environment Safety (CFEES) chu vanduaina thlen dan chhui chiang a, hetiang thil a thlen nawn tawh lohna tura rawtna a neihte thehlut tura hrilh an ni dawn bawk niin road transport ministry chuan a tarlang. CFEES chu an thil chhuina an hmuhchhuahte hraittir vek turin an ngen a ni. Tun hnai vaiah Pure EV pathum, Ola pakhat, Okinawa pahnih leh Jitendra EV scooter 20 chu an kang tawh a ni.