PMO-in sipai video tihchhuah chungchang zawtfiah

Prime Minister Office chuan, Border Security Force (BSF) sipai pakhatin Facebook video a tihchhuaha sipaite chaw dawn chhiat thu a sawi chuan ngaihven a hlawh hle a, Prime Minister Narendra Modi-a office chuan Home Ministry hnenah thil awmdan a zawtfiah.

BSF constable Tej Bahadur Yadav chuan Fabebook-ah video pali a tihchhuak a, sipaite ei tur dawn ṭhat tawk loh thu a sawi a, dal tui an dawnte chu a dal hle a, an chhang dawnte pawh a ut leh kang te a nih thu a sawi a, a video dahchhuah hian social media-ah hian vawi maktaduai thum chuang zet en a hlawh tawh a ni.

PMO chuan Home Ministry hnenah sipai complaint siam chungchang hi thil awmdan a zawtfiah a, Ministry pawhin he video hi an chhui chian mek thu an sawi.

Sipai chhungte chuan thu dik tak a tarlan avangin video siamtu sipai hian a tuar niin an sawi. Video hi a darh hnuah, sipai hi Poonch-a Line of Control aṭangin Rajouri-ah sawn nghal a ni.

Yadav-a nupui Sharmilla-i chuan, “Ka pasal thiltih hi a tihtur dik tak a ni. Sipai pumpui tan a ṭawngchhuak a ni. Ei tur ṭha zawk pe tura a dil hi pawikhawihna a ni lo, thil awm dan dik tak a pholang zawk a ni” a ti.

Hetihlai hian BSF chuan, Yadav hian record ṭha lo tak tak a nei tih a sawi a, zu in te a ching a, mahse inngaihhnathiamna avangin thubuai siamsak a ni lo mai niin an sawi.

Video a tihchhuahah, Yadav hian khawvawt tak hnuaiah duty-in darkar rei tak tak an ding a, mahse ei tur an dawn erawh a chhe hle tih a sawi. A chang phei chuan sipaite chu rilṭam taka an mut a ngaih changte a awm niin a sawi. Breakfast atana an dawnte pawh tilangin, parantha kan ut pakhat leh thingpui no khat, butter leh jam pawh telh lo a ni a, hetiang ei tur chhe tak nen chuan sipaiten an hna an thawk ṭha thei dawn em ni? tiin zawhna a siam a, a video chu a tam thei ang ber thehdarh turin a thlirtute a ngen bawk a ni.