Khawlum zual zel karah sorkar laipuiin mipuite thurawn a pe

India ram hmun hrang hrangah khaw lumin zual lam a pan zel a, hei vang hian sorkar laipui chuan state/UT te chu health facility dinhmunte enfiah a, damdawi leh mamawh dangte a awm ṭha tawk em tih ennawn tur leh, tui thianghlim in tur a tam tawk em tihte ngaihven ṭha turin a ti.

Union health secretary Rajesh Bhushan chuan April 30 khan chief secretary tinte lehkha thawnin, khawlum vanga natna thlen thei chungchangte rang zawka hriat leh enkawl an nih theih dan turte health staff-te chu hrilh turin a ti. Health facility tinah tui thianghlim in tur a tam tawk em tih leh, boruak tihdaihna hmanruate a hman tlak em tihte enfiah reng turin a ti a ni.

Pawn lama ni sa tak hnuai leh, inchhung boruak lum lutuk hnuaia awm reng hian khawlum kaihhnawh natna a thlen thei a, heat rash (khawlum bawl), heat oedema (kut, ke leh ke rek vung), heat cramps ( tha chat), heat tetany, heat syncope (thidang), heat exhaustion leh heat stroke te thlen thei hi sorkar chuan a sawi.

Khaw lum laka invenna tura mipuite thurawn a pekte chu
1) Chhun dar 12 leh chawhnu dar 3 inkarah pawn, ni sa hnuaia chhuah loh hram tum tur.
2) Chawhnu lam khawlum zual laiin pawn lamah hna hahthlak lutuk thawh loh
3) Zu, thingpui, coffee leh sugar tamna in tur chi in loh.
4) Motor park-naah naupang leh ranvulhte kalsan loh tur.
5) Protein tamna chaw lam chi leh ei tur ṭhing ei loh hram tur.
6) Tui in tam tur, a theih anga tam pawn chhuak loa inchhunga awm tur.
7) Kum upa leh natna neite chu nitin an hriselna dinhmun enfiah tur
8) Pawn lama hnathawk ṭhin tan direct-in ni sa do loh tur. Hnathawkte chu a chhawrtute chuan tui vawt in tur an pe ang a, an hnathawhna hmun pawh ni sa lakah a theih angin zar hliah tur.