Covid-19 vaccine la turin tumah nawr luih theih a ni lo : SC

Supreme Court chuan Covid-19 vaccine la turin tumah nawr luih theih a ni lo tih nimin khan a sawi.

Nimin khan Supreme Court chuan Dr Jacob Pluyel-a'n vaccine lak luih tir nia sawi leh, Covid-19 vaccine clinical trial data leh post-vaccination data chiang zawka puanzar phuta PIL a thehluh chu a ngaihtuah a ni.

Justice L Nageswara Rao leh BR Gavai awmna bench chuan, mimal dikna leh thuneihna chu Constitution hnuaiah humhalh sak a ni tih sawiin, state sorkar ṭhekhatin vaccine la lo chungchangah khuahkhirhna siam a, vaccine la lote tana vantlang hmun kal khapna an siamte chu thil dik a ni lo a, sut leh nghal tur a ni, a ti bawk.

Supreme Court chuan sorkar laipui hnenah Covid-19 vaccine lak avanga a nghawng ṭha lo tuar zat data chu mipui hriata puangzar turin a ti.

Naupangte vaccine pek chungchangah, mithiamte ngaihdan lo sawihnawm chu thil tihchi a ni lo a, global standard leh practice an zawm a ni, tiin bench chuan a sawi.

Sorkar laipui chuan vaccine pek chungchangah insawifiahin, Covid-19 vaccine chu lak ngei ngei tura nawr luihna a awm lo a, mahse a la thei chin 100% te pek tumin hma an la tih chauh an sawi thu a tarlang. A hma pawhin court hnenah hian Covid-19 vaccine leh an composition zawng zawng chu mipuite hmuh theiha dah lan a nih thu leh, vaccine hmante pawh a ṭhain a him tawk tih a lo sawi tawh a ni.

Kumin March 13 thlenga Covid vaccine pek chhuah tawh, dose vaibelchhe 180 zingah vaccine lak vanga nghawng ṭha lo, adverse effect nei nia insawi hi 7,314 an awm a, hei hi vaccine la tu zinga 0.0004% an ni. March 12 thleng khan tleirawl, kum 15-18 inkar mi vaibelchhe 8.91-te vaccine pek an ni tawh bawk a, an zingah adverse events following immunistation (AEFI) report hi 1,729 an awm a, serious deuh 81 an awm tel.