Sorkar laipuiin state Health Minister-te summit neihpui dawn

Sorkar laipui chuan May 5-7 chhung hian state tin health minister-te chu health summit a neihpui dawn.

Summit hi Gujarat-a Kevaida-a Statue of Unity-ah neih a ni dawn a, he hunah hian state leh Union Territory-a health minister-te an tel vek ang. Covid hri leng do hna thawh dan te, sorkar laipui hmalakna - Heal by India leh Heal in India tihte chu an sawiho dawn a ni.

State hrang hrangten Covid hri kai an chhinchhiah dan te, vaccine pek chhuah hna an kalpui dante pawh uluk taka zirchian a ni dawn nia sawi a ni. He meeting hi state tinten hri leng dona kawnga an hmalakna ṭha inhrilhtawnna atana hman a ni dawn bawk.

State leh UT tinte hian hri leng dona kawnga an hmalak dante minute thum chhung presentation anei vek dawn a, a hnuah health minister-te hian thu a sawi zui bawk ang.

Tun hnaia prime minister Narendra Modi-a'n campaign a hawn, 'Heal by India' chungchang chu ni thum awh tur summt-ah an ngaihtuah tur pawimawh zingah a tel.

April 20 khan PM Modi chuan Gandhinagar, Gujarat-a Mahatma Mandir-a Ayush investment summit-ah hemi chungchang hi a lo sawichhuak tawh bawk. He summit hi World Health Organisation (WHO) director Dr Tedros Adhanom Ghebreyesus leh Mauritius prime minister Pravind Jugnauth-te pawhin an chhim a ni.