Document thuruk tiputrua puh Jharkhand MLA lakah thubuai ziaklut

Jharkhand indepen­dent MLA Saryu Roy chu 'secret document' tihputrua puh a nih avangin Indian Penal Code leh official secret act-a section hrang hrang hnuaiah thubuai siamsak a ni.

Police-te chuan state health department secretary Vujay Verma-a'n secret document tihputrua MLA Roy a puh hnuah, thubuia hi an ziak lut tih an sawi. He puhna hi chhuichian nghal a nih tur thu leh , a ṭul anga action lak a nih tur thu an sawi bawk.

Thla khat dawn liam taah khan MLA Roy hian state health minister Banna Gupta chu a thuneihna dik lo taka hmangah a puh a, Health Minister cell hnuaia thawk mi 60-te chu dik lo takin Covid incentive a sem a, amah Minister leh a personal assistant te ngei bawkin an la a ni, a ti. Mahse minister Gupta chuan a puhna hi thu dik lo nia sawiin, April 18 khan legal notice pein, a thusawi avang hian ngaihdam dilna siam turin a ti.

MLA Roy chuan thubuai siamsak a nih chungchangah, "Sorkar chuan FIR ziak lutin min man thei a ni thei. Mahse hei vang hian dik lo taka eirukna thleng chungchang ka sawi loh phah dawn lo. Kum 1982 aṭang khan eirukna doin theihtawpin ka bei a, ka bei chhunzawm zel dawn a ni," tiin a sawi.

Minister a puhna chungchangah paper-te chu khawi aṭanga a hmuh nge tih a pawimawh ber lo a, sorkar chuan heng paper-a inziakte hi a dik nge dik lo tih a sawifiah a ngai a ni, a ti.