Delhi sorkarin Covid hri kaite enkawlna tur khum tipung

Delhi sorkar chuan khawpui chhungah Covid-19 hri kai an pun chhoh leh tak avangin hospital pahnihah hri kaite enkawlna tur khum a dah belh.

Sorkarin hri kaiten enkawlna pui ber atana a hman, khum 2,000 awmna LNJP Hospital-ah Covid kai enkawlna tura khum 250 a dah chu khum 450-ah atipung a, ICU pawh a hmaa khum 100 a dah aṭangin 178-ah a tipung leh bawk. GTB Hospital-ah pawh hri kai enkawlna tura khum 100 dah chu khum 400-ah tihpun a ni a, ICU-ah pawh a hmaa khum ruahman awm lo chu khum 50 dah a ni bawk.

Delhi health minister Satyendar Jain chuan Delhi khawpuiah hri kai hi pung thar leh mah se hri kaite dinhmun an ngaihtuahawm lo a, damdawi-ina dah ngai pawh an tlem hle tih a sawi.

Thawhṭanni khan India ramah Covid-19 hri kai thar 2,568 awmin, a zawna ni nga chhung hri kai thar 3,000 chung lam an awm hnuah a tlahniam ve leh ta deuh a ni. Hemi ni vek hian hri vanga thi mi 20 an awm belh leh bawk.

Delhi khawpui bikah Thawhṭanni khan hri kai thar hi 1,076 an awm a, khawpui chhunga hri kai mek, active case awm zat hi 5,744 an la tling.