Lakshadweep sorkar hnenah midday meal-a sa telh turin hriattir

Supreme Court chuan Laskhadweep sorkar chu school naupangte hnena chaw chhun, midday meal an pekah sa telh turin a hriattir.

Lakshadweep sorkarin bawng vulhna farm khar a, school naupangte midday meal-a sa leh sa aṭanga siam, arsa te pawh huama telh tawh lo tur tih chungchanga petition thehluh chu Thawhṭanni khan court hian a ngaihtuah a ni.

Kum 2021, June 22 khan Kerala High Court chuan Laskhadweep sorkarin dairy farm khar leh, midday meal-a sa telh tawh lohna tur thupek a siam chungchang chu a 'stay' sak tawh bawk.

Justice Indira Banerjee leh AS Boppanna awmna Supreme Court bench chuan High Court thupek chhuah tawh chu chhunzawmin, midday meal-ah sa hi telh chhunzawm turin a ti.

PIL thehluttu Ajmal Ahmed chuan Laskhadweep administrator-a Praful Khoda Patel a awm aṭangin he thliarkar animal husbandry department hnuaia ran vulhna hmunte chu khar tumin hma a la a, mipuite chaw ei dan kalphungte chu a sawisel fo niin a sawi. Kum 2021, May 21 khan Director of Animal Husbandry chuan bawng vulhna hmunte khar vek turin thupek a tichhuak a, hei hi bawng talh khapna, Animal Preservation (Regulation), 2021 hman tumna vang a ni, a ti bawk. He dan hnuaiah hian bawngsa leh bawngsa atanga siamte chu lei leh zawrh khap vek a ni dawn a, hei vang hian thliarkar chengte bawnghnute an hmuhna pawh a tawp dawn a, Gujarat aṭanga an lei a ngaih phah dawn niin a sawi a ni. Hei vang hian sorkar chuan school naupangte midday meal-a arsa leh sa dang telh ṭhin pawh tihtawp vek a tum bawk a ni, a ti.