Khaw lum vangin Haryana sorkarin school kal hun tidanglam

Haryana state chuan khaw lum lutuk avangin vawiin aṭanga hman ṭan turin school kal hun a tidanglam a, hei hian sorkar leh private school-te pawh a huam vek ang.

Additional Chief Secretary School Education Dr Mahavir Singh chuan thuchhuah a siamah, khaw lum vangin state pumah school timing hi tidanglamin, May 4 aṭangin Class 1-XII te school kal hun hi zing dar 7 aṭanga chhun dar 12 thleng a nih thu a sawi.

Indian Meteorological Department (IMD) chuan Thawhṭanni khan India hmarthlang lam bialah khawlumin zual lam a pan zel avang hian yellow warning a lo tichhuak tawh bawk.

India ram hmun hrang hrangah khua a lum chhoh zel avangin sorkar laipui pawhin mipuite tan khawlum vanga natna thleng thei laka invenna tur thurawnte pawh a lo tichhuak tawh bawk. April thla khan India rama kum 122 chhunga April thla lum ber pathumna a tling pha.

Maharashtra-ah chuan khaw lum vang hian mi 25 in nunna an chan tawh a, kum 2016 hnua khaw lum vanga nunna chan an tam ber kum a ni. Khaw lum lam hian 46 degree Celcius te a tling a ni.