PM Modi-a'n Denmark leh Norway PM-te a kawm ; Denmark lalnuin zanriah a buatsaih sak

Europe ram pathum tlawha zin chhuak mek, prime minister Narendra Modi chuan nimin khan Denmark khawpui, Copenhagen-ah Denmark leh Norway prime minister-te a kawm.

PM Modi hian Thawhlehni khan Berlin, Germany aṭangin Copenhagen hi a thleng a, hemi ni hian Denmark prime minister Mette Frederiksen nen pawh meeting neiin, ram pahnihte inlaichinna leh insumdawn tawnna chungchangte an sawidun a, Ukraine ram dinhmunte pawh an sawidun bawk. Skill development, Vocational Education and Entrepreneurship lama thawhdunna tur, Memorandum of Understanding (MoU) pakua an ziak a, ministerial level-a energy policy dialogue neih an remti bawk. Tlai lamah Copenhagen-a India mi awmte nen PM Modi hi an inkawm a ni.

Thawhlehni zan khan Denmark lalnu, Queen Margrethe II chuan Copen­hagen-a Amalienborg-a PM Modi pual hian zanriah a lo buatsaih sak bawk.

Nimin khan Modi chuan Copenhagen-ah vek hian Norway prime minister Jonas Gahr Store chu meeting a neihpui a, ram pahnihte inlaichinna leh thawhdunna lama hmasawnna zau zawk an neih theih dan turte an sawidun a ni. Hemi hnu hian 2nd India-Nordic Summit-ah a tel leh. He summit-ah hian Denmark, Iceland, Finland, Sweden leh Norway prime minister-te an tel a ni.

Foreign secretary Vinay Kwatra chuan India-Nordic summit-ah hian trade and investment, digital and innovation partnership, green partnership leh economic cooperation-te sawiho a nih thu a tarlang.

Modi chuan Nordic ramte chu sustainability, renewable energy, digitisation leh innovation lama India thawhpui pawimawh takte an nih thu sawiin, Norway ram a tlawh chuan Nordic bialte nena an thawhhona pawh a tihṭhat zual phah ngei a beisei thu a sawi a ni. Kum 2020-21 khan India leh Nordic ramte insumdawn tawnna hi USDS tld 5 chuang a tling a ni.

Modi hian Nimina Copenhagen-a hun a hman zawhah, PM Modi hian France lam a pan leh nghal a, Paris-ah rei vak lo chawlin, President thlan thar Emmanuel Macron nen meeting an nei a ni.