Raj Thackeray-a'n loudspeaker protest chhunzawm zel tum

Maharashtra Navnirman Sena (MNS) hotu Raj Thackeray chuan sakhaw biakna hmun aṭanga aurinna tihchhuah duh lohna chu a lantir chhunzawm zel dawn tih a sawi.

Raj Thackeray chuan mosque aṭanga aurinna hmanga azaan an sawi lai hi tihchhuah a nih chuan, aurinna hmangin a aia ringin Hanuman Chalisa a tichhuak ve nghal zel dawn tiin a vau. Nimin zinga Muslim-ten azaan an sawi hunah pawh mosque tam zawkah chuan aurinna hmanga tihchhuah a ni lo a, a hmang ṭhenkhat pawhin an ti ring lo a ni.

Loudspeaker hman duh lohna lantirtu MNS worker 250 vel chu state chhung hmun hrang hrangah man an ni tawh a, Raj Thackeray-a chenna pawna pungkhawm MNS worker eng emaw zat man an ni tawh bawk.

Thackeray chuan, "State chhung leh pawn lam aṭangin call ka dawng a, kan party worker eng emaw zat man an nih thute min hrilh a ni. Supreme Court thupek zawmtute man an ni a, a zawm lote chu zalen takin an awm zawk si a ni," a ti. Loudspeaker an dodal chungchangah mosque-a hman chauh an dodal lo a, temple tam takah pawh dan kalhin loudspeaker hi an hmang a ni, a ti.

MNS hotu chuan an thil buaipui chu ni hnih khat thil a ni lo tih sawiin, mosque-ten dan hi an zawm lo a nih chuan Hanuman Chalisa chu a leta ringin an tichhuak ve zel dawn tih a sawi. Sakhaw biakna hmun aṭanga loudspeaker hmanga ring tak taka tihchhuah ṭhin hi zirlai leh damsam loten an tuar a ni, tiin a sawi. Loudspeaker hman an duh lohna chu sakhaw thil lam ni loin, khawtlang nun tibuai thei zawk a ni tih a sawi a, Azaan an sawi chu a dodal lo a, loudspeaker an hmang chu a duh lo a ni, tiin a sawi.