J&K assembly siam ṭhat dan turah Delimitation panel-in order ziak fel

Justice (retd) Ranjana Desai kaihhruai, member pathum awmna Delimitation Commission on Jammu and Kashmir chuan nimin khan J&K union territory-a assembly constituency siamṭhat dan tur chungchanga final order chu an tifel ta. He final order hi an term tawp hma niin an tifel hman a ni.

Commission-in constituency zat tur leh an huam chin tur chungchanga final order an siam hi sorkarah an thehlut ang a, hemi hnu hian gazette notification tihchhuah a ni ang. Commision hian J&K-a seat awm zat hi 83 aṭangin 90-a tihpun an rawt. Jammu tan seat paruk leh Kashmir tan seat pakhat siam belh an rawt a ni.

Pakistan-occupied Kashmir (PoK)-ah seat 24 awmin, a ṭum khatna atan UT assembly-ah hian Scheduled Tribe tan seat pakua dah rawt a ni bawk.

Assembly con­stituency siamṭhat dan tur chungchang ngaihtuah tur hian kum 2020 March thla khan Delimitation Commission hi din a ni a, kum khat hun pek an nih hnuah nikum khan kum khat dang hun pawhsei sak an ni a, February thla khan thla hnih dang pawhsei sak an ni leh bawk a, an term hi vawiin hian a tawp tawh ang. Panel-ah Justice (retd) Ranjana Desai bakah chief election commissioner Sushil Chandra leh J&K state election commisioner te chu ex-officio member-ah an awm a ni.