Prashant Kishor-a'n political party din tum rih lo

Political strategist hriat lar, Prashant Kishore chuan political party thar din a tum mai lo tih Ningani khan a sawi. Hemi rual hian Bihar state chhunga ke-a kalin, km 3,000-a thui kalkual a, sorkar ṭha chungchanga mipuite ngaihdan lak a tum tih a sawi.

Prashant Kishore hi eng political party berah emaw a lut dawn tih leh, party thar a din dawn tih thawmte a awm hnuah nimin khan a insawifiah a ni. PK chuan political party thar din loin, thla 3-4 chhung chu Bihar-ah hian km 3,000 a thui Padyatra a nei phawt dawn tih a sawi. Hemi chhung hian mi hrang hrangte chu sorkar ṭha chungchanga an ngaihdante zawtin, a tam berin party thar din ṭhaa an sawi chuan hemi atan hian hma a la zawk dawn tih a sawi a ni. Padyatra hi October 2-ah West Champaran aṭangin a ṭan tur thu a sawi bawk.

"Political party thar din a nih pawhin a hotu ber emaw, thuneihna changtu ber emaw ka ni lo ang," a ti.