Khaw lum chungchangah PM hoin review meeting nei

Prime minsiter Narendra Modi kaihhruaiin tunlaia India ram hmun hrang hrangah khaw lum zual zel laka invenna dan tur leh, fur lo thleng tur atana inbuatsaih dan turte sawihoin nimin khan review meeting neih a ni.

Europe ram pathum tlawha zin, PM Modi hi nimin zingah rawn kirin office a kal nghal a,nimin khan meeting eng emaw zat a nei nghal a ni.

Ram chhung hmun tam takah khaw lum lam hian degree celsius 45 te a tling a, hetiang chin a thlen hian heatwave tih a ni. Khaw lum avang hian mi tam takin harsatna an tawk a, sorkar lam pawhin mipuite tan invenna tur thurawn pawh a lo tichhuak tawh bawk. Weather department chuan khaw lum lutuk vang hian state panga - Rajasthan, Delhi, Haryana, Uttar Pradesh leh Odisha-ah orang alert a lo tichhuak tawh.

Himachal Pradesh-ah chuan khaw lum lutuk avangin ram eng emaw zat a kang tawh. Tun ang hunah hian Himachal Praesh-ah hian ruah leh rialte a thawk ṭhin a, mahse kumin chuan hmun tam zawkah thla hnih chhung ruah asur tawh lo a ni, hei vang hian kum dang aiin ram kang pawh a nasat phah hle.

Delhi-ah chuan Nilaini khan hmun ṭhenkhata ruah surin rialte a tla, boruak pawh a tidai deuh. Mahse vawiin aṭangin khaw lum hian zual lam a pan chho leh nghal dawn niin khaw chin zirtute chuan an sawi. April thla kha Delhi-ah chuan kum 1951 hnu lama April thla lum ber dawttu niin, he thla chhunga khaw lum lam hi chawhrualin 40.2 degree Celsius a tling pha. Delhi-a April thla lum ber ṭum chu kum 1941 kha niin, a lum lam hi 45.6 degree Celsius a tling a ni.