Khali Calendar-ah Gandhi aiah Modi-a thlalak dah

Khasi Village Industries Commission (KVIC) chuan kumin calendar leh diary a tihchhuahah, kumtina an dah ṭhin, Mahatma Gandhi-an ‘charkha’ (hmui) a her lai thla an dah ṭhinah, Gandhi thlalak aiah Prime Minister Narenda Modi thla an dah.

Gandhi thlalak aia Modi-a thlalak dah a ni hi hnathawktu leh official tam zawk pawhin mak an tih hle a, an lungawi lo hle nia sawi a ni.

Commission calender-ah hian Khadi movement dintu, Mahatma Gandhi-an charkha a her lai thla hi dah a ni ziahṭhin. He movement hi Britain laka non-violent movement lantirna leh, ramdang siam bungrua lakluh tur boycott-na atana an kalpui a ni.

KVIC chairman Vinai Kumar Saxena chuan calendar-a thlalak an thlak chu thil dang­dai lutuk a ni lo tih sawiin, a hma pawhin thil thlak dang­lam a lo awm tawh ṭhin tih a sawi. “Khadi industry pum hi Gandhi-a philosophy leh a suangtuahna lo neih dan anga kalpui a ni a, Gandhi chu KVIC khaipa leh innghahna a ni a, he thil thleng vang hian a pawimawhna hi kan ngaihthah ta tihna a ni lo”, a ti. Prime Minister Narendra Modi pawhin kut tah puan a inbel fo a, ramdang palai zinga a awm pawhin a ha fo a ni, a ti.

Hetih lai hian KVIC staff-te chuan calendar aṭanga Gandhi-a thla dah chhuah a ni chu pawi an tih thu an sawi a, nikumah pawh calendar-a PM thalak dah hi an lo tum tawh niin a sawi a, mahse staff union chuan an duh lohna an lantir a ni, a ti.