SC thutlukna puan loh vangin lungawi lo

Tamil Nadu-a eptu pawl, Dravidar Munnetra Kazhagam (DMK) chuan Supreme Court-in an state-a kut pawimawh, Pongal festival hmannaa an telh ṭhin infiamna chi khat, bawng an chaih ṭhin, Jallikattu sport chungchanga thutlukna a puan duh loh vangin lungawi lohna an lantir.

Eptu party chuan sorkar laipui leh an state-a rorellai, AIADMK sorkar chu Jalitkattu hman a nih theihna atana hma la duh lohah an puh bawk.

DMK chuan, “Jallikattu hi kan lo tih ṭhin leh kan kalphung a ni a, mahse sorkar laipui leh state sorkar chuan nei chhunzawm turin phalna min pe duh lo a ni”, a ti.

Hetihlai hian Supreme Court-a justice Dipak Misra leh R Banumathi awmna bench chuan vawiin aṭanga ṭan tur, Tamil harvest festival Pongal ṭan hmaa thupek tichhuak tura bench lo ngen chu thil awm lo tak a nih thu an sawi thung.

Kum 2014 khan Supreme Court chuan Jallikattu sport neihna atana bawng hman leh, bawng tawlailir intlansiak neih ṭhin chu a lo khap tawh a, mahse nikum January thla khan sorkar laipui chuan Tamil Nadu-a Jallikattu khapna hi khuahkhirhna ṭhenkhat siamin a hlip a ni. Sorkar thupek hi Animal Welfare Borard of India, People for Ethical Treatment of Animals (PETA) India chuan Supreme Court-ah a khing let a, court chuan sorkar laipuiin Jallikattu-a bawng chaih a phalsak chungchang chu sawifiah turin alo ti tawh bawk. Mahse court chuan sorkar laipui thupek khinlet a nih chungchangah hian thutlukna a la tichhuak lo.

Hetihlai hian Pongal festival hi vawiin aṭanga neih ṭan a nih dawn avangin Tamil Nadu mipui tam tak chuan festival-a an lo neih tel ziah ṭhin, Jallikatu hi neih tel ngei an phut. Tamil Nadu Chief Minister O Panneerselvam pawhin bawng an chaih ṭhin hi telh a ni theihna atan a kaihhruai sorkar chuan theihtawpin a bei dawn tih a lo sawi tawh a ni.