India ramah Covid hri kai thar 3,545 awm belh leh ; WHO-in India-ah Covid kaihhnawiha thi mtd 4.7 niin a chhut

India ramah Ningani khan Covid-19 hri kai thar 3,545 an awm belh leh a, hri vanga thi mi 27 an awm bawk.

Hri kai mek mi 19,688 an awm a, hri kai hmuh chhuah tawh mi 4,30,94,938 aṭangin 0.05% an ni. Hri kai dam leh tawh hi mi 4,25,51,248 awmin, recovery rate hi 98.74% a ni.

Ni khata hri kai thar, daily positivity rate hi ram pum huapin 0.76% a ni a, kar khata hri kai thar awm hi 0.79% a ni bawk.

Union health and ministry data tarlanah, India rama Covid-19 hri len tirh aṭanga hripui vanga thi hi nimin zing thleng khan mi 5,24,002 an awm tawh a ni.

Hetih lai hian Ningania World Health Organisation report tihchhuah chuan kum 2020 leh 2021 chhungin India ramah Covid hri leh a kaihhnawih vangin mi maktaduai 4.7 an thi niin a tarlang. Hei hi sorkar-in kum 2021 kumtawp thlenga hri vanga thi zat official-a a tarlan, mi nuai 4.81 aiin a let 10 dawnin an tam zawk.

India chuan WHO-in hri vanga thi zat a chhut dan hi a pawm lo tih a sawi nghal a, sorkar laipui chuan hemi chungchangah hian WHO chu lehkha 10 vel zet a thawn nghal a ni. WHO chuan India dinhmun dik tak hrechiang loin, hri vanga thi zat hi nasa takin a chhut tam a ni, a ti.

WHO report tihchhuah hma ni hnihah Registrar General of India (RGI) chuan civil registration system (CRS) kaltlangin kum 2020 chhunga naupiang thar leh mitthi zat a chhinchhiah, annual data chu a lo tichhuak a, hetah hian a kum hmasa lam aiin ram chhunga hemi kuma mitthi zat hi nuai 4.75 velin an tam a ni. Mahse CRS hian mitthite thihna chhan hi a chhinchhiah tel lo.