Covid hri a reh hunah CAA hman a ni ang : Amit Shah

Union home minister Amit Shah chuan Covid-19 hri leng hi a reh hunah Citizenship Amendment Act (CAA) chu hman a ni ang, tiin Ningania West Bengal a tlawh ṭumin a sawi.

North Bengal-a Siliguri-a vantlang inkhawma thu a sawiah, Amit Shah chuan, "Trinamool Congress chuan CAA hi hman a ni dawn lo tiin thu dik lo an thehdarh a, mahse Covid-19 hri leng hi a reh hunah CAA hi kan hmang nghal dawn a, kan unau raltlante chu India khua leh tui nih theihna tur hi kan pe dawn a ni," a ti.

West Bengal chief minister, Trinamool Congress (TMC) hotu Mamata Banerjee chu sawiselin, "Mamata chuan kan unau raltlanta rawn lutten khua leh tui nihna an neih hi duh loin, Bengal-a dan loa lutte awm chu a duh zawk a ni. Mahse Trinamool chuan ngun takin lo ngaihthla sela, CAA hi a takin hman a ni dawn. Trinamool chuan hei hi an tidanglam thei lo," tiin a sawi.

Kum 2019-a siam, CAA hi Afghanistan, Bangladesh leh Pakistan-a an sakhaw kaihhnawih thil avanga tihduhdah tawk, India rama rawn tlanchhia Hindu, Sikh, Buddisht, Jain, Parsi leh Kristian-te India leh khua tui nihna pek theihna tur a ni. He dan hian Muslim-te a huam tel loh avangin sawizui pawh a hlawh hle.

Union Home Minister hi ni hnih chamin West Bengal-ah a zin a, public meeting a neihah Bengal-a rorellai, TMC sorkar chu na takin a bei a ni. TMC chu an state chhunga politics thil avanga inthahna, tharum thawhna leh eirukna thlengte titawp thei loah a puh.

Hetih lai hian TMC hian a zawna term thumna atana sorkar a siam mek chu kum khat a hmang tling ve chiah a ni.