Covid-19 hri kai zinga 62.08% enkawl dam tawh

India ramah Covid-19 hripui kai nitinin nasa takin pung bawk mah se enkawl dam pawh an tam tawh hle a, hri kai mek aiin enkawl dam tawh hi nuai hnih chuangin an tam tawh zawk.

Nimina Ministry of Health and Family Welfare report tihchhuahah chuan darkar 24 chhungin hri kai hmuh chhuah thar mi 24,879 an awm a, hri len ṭantirh aṭanga nimin thleng khan mi 7,67,296-in hripui an kai tawh. MoHFW hian report an tihchhuah hma darkar 24 chhungin hri kai mi 19,547 lai enkawl dam an nih thu tarlangin heti hian hri kai enkawl dam mi 4,76,378 an awm tawh a, enkawl dam tawh rate pawh hi a sang tawh hle a, 62.08% tling tawhin hri kai mek 2,69,789 an la awm thung.

Covid-19 vang hian India ramah mi 21,129 an thi tawh a, nimina report tihchhuahah chuan mi 487 an thi leh a ni.

Indian Council of Medical Research (ICMR) chuan nimina report an tihchhuahah chuan darkar 24 chhungin Covid-19 sample 2,67,061 an test tih sawiin hei hi ni khata sample test tam ber ni a ni leh. Hri len ṭantirh aṭanga nimin thleng khan sample 1,74,00,832 an test tawh.

ICMR hian Covid-19 test-na tur laboratory pawmpui hi ramchhung hmun hrang hrangah 1132 a nei tawh a heng zinga 805 lai hi sorkar laboratory a ni a, 327 chu private laboratory a ni ve bawk.

India ram state leh union territory zinga Covid-19-in a nghawng nat zual pathum Maharashtra, Tamil Nadu leh Delhi-ah chuan hri lengin ziaawm lam a pan thei lo a, nimin report-ah pawh hri vangin an la buai hle.

Maharashtra-ah chuan hri kai hmuh chhuah thar 6,603 lai an awm leh a, heti hian mi 2,23,724 chuan an kai tawh a ni. Hri kai mek 91,084 awmin enkawl dam 1,23,192 an awm tawh a, 9,448-in an thihpui tawh bawk. Tamil Nadu-ah chuan hri kai 1,22,350 an awm tawh a, 74,167 chu enkawl dam tawh niin 46,483 chuan an la kai mek a, 1,700-in an thihpui tawh. India ram khawpui Delhi-ah chuan mi 1,04,864 laiin hripui an kai tawh a, 78,199 chu enkawl dam tawhin 23,452-in an la kai mek a, 3,213-in an thihpui tawh a ni.