Patna-a lawng chesualah mi 24 an thi

Bihar khawpui, Patna khawpuia Ganga luiah kar kalta Inrinni khan lawng a chesual a, lawng chesuala thi zat hi nimin thleng khan mi 24 an tling tawh a, chin hriat lohin mi eng emaw zat an la awm.

Lawng chesuala thite hi Makar Sankranti denchhena lehkhachaih inchaihsiakna festival neih hmanga kalte an ni. He festival hi state Tourism Department-in a buatsaih a ni. He festival hmanga kalte phurhawtu lawng chu Inrinni zan khan Patna khawpui a, National Institute of Technology (NIT) bula Ganga luia a kal laiin, lui kam a thlen dawn hnaihah chesualin a let zui a ni.

Chetsualna thlenna hmunah hian chhanchhuah hna thawk turin National Disaster Response Force (NDRF) tirh nghal an ni a, nimin thleng khan ruang zawn hna hi thawh chhunzawm zel ala ni.

Prime Minister Narendra Modi chuan lawng chesuala thi chhungte a tawrhpui thu leh, PM National Relief fund aṭanga cheng nuai hnih ṭheuh pek an nih tur thu a sawi a, hliam tuar na zualte chu Rs 50,000 ṭheuh pek an ni dawn tih a sawi.

Bihar Chief Minister Nitish Kumar chuan lawng chetsualna thleng chu pawi a tih thu sawiin, thi chhungte chu cheng nuai li ṭheuh pek an nih tur thu a puang.

CM Kumar chuan chetsualna thlen dan hi chhuichiang turin thupek a tichhuak a, Principal secretary, disaster management department, Pratyaya Amrit, Patna deputy inspector general of police Shalin leh Patna district magistrate Sanjay Kumar Agarwal-te chu chhui tura ruat an ni.

Lawng chetsualna thleng chungchang hi politics lama inbeihna atan an hmang zui nghal bawk. Deputy Chief minister hlui leh BJP hruiatu, Sushil Kumar Modi chuan chetsualna thlengah hian CM Nitish Kumar chu mawhphurtuah puhin, a lakah FIR ziak lut turin a phut a ni.