Navjot Sing Sidhu-a’n Congress a zawm CM hlui fanu-in BJP a zawm

State assembly inthlan nei tura inbuatsaih mek Punjab-ah chuan, cricketer-turned-politician Navjot Singh Sidhu chuan nimin khan Congress party a zawm.

February 4-a in­thlang tur, Punbaj-ah hian Navjot Singh Sidhu hian hriat a hlawh hle a, hei vang hian inthlan neih turah pawh hian Congress tan vote eng emaw zat a hui luh rin a ni. Sidhu-a nupui, Chief Parliamentary Secretary hlui Navjot Kaur Sidhu pawhin nikum November thla khan BJP chhuahsanin Congress party a lo zawm tawh a ni.

Sidhu hian nikum September thla khan BJP a chhuahsani a, Rajya Sabha MP a nihna aṭang pawhin a bang nghal bawk. BJP chuan an party thuammawina atan chauh an hmang duh nia sawiin, Punjab aṭanga dahchhuah an tum niin a sawi. BJP a chhuahsan hnu hian AAP nen an inbe zui a, mahse inremna an siam thei lo a ni.

AAP nena an inbiakna a tlawlh hnuah Sidhu hian Punjab-ah India hockey captain hlui, Pargat Singh leh MLA Simarjit Singh Bains leh Balwant Singh Bains-te nen political pawl thar, ‘Aawaaz-e-Punjab’ an din a ni.

Sidhu hian Congress party vice-president Rahul Gandhi nen ṭum thum meeting an neih hnuah, Pathianni khan Congress hi a zawm ta a ni. Congress party hian assembly seat 117 awmna, Punjab inthlan neih tur atana an party candidate tur mi 100 hming a puang tawh a, seat 17-a candidate tura ala puang lo. Sidhu-a nupui bial, Amritsar (east) assembly constituency-a ding tur ala puang tel lo bawk a, he bialah hian Sidhu hi an dintir rin a ni.

Punjab-a Congress Chief Minister hlui Beant Singh-a fanu, Gurkanwal Kaur chuan nimin khan BJP a zawm ve bawk.

Kaur-i hian Inrinni khan New Delhi-ah Finance Minister Arun Jaitley a hmu a, BJP a zawm tur thu hi a puang a ni. Punjab sorkara minister pawh lo ni tawh, Kaur-i chuan Congress Party in party leh state tana amah leh a pa inpeknate a ngaihthah thu sawiin, an hnathawhte a hriatsak duh lo niin a sawi. Kum 11 zet Congress women’s wing tan a thawk tawh a, mahse party chuan engmah a hriatpui duh lo a, Punjab tana a pa inpekna pawh a hriatpui duh lo a ni, a ti.

Gurkanwal Kaur-i hi kum 2002-2007 khan Janlandhar bial MLA a ni a, a nuṭa Tej Pratap Singh chu minister a lo ni tawh bawk a ni.