PM-in sipaite zahna hlan

Prime Minister Narendra Modi-a chuan nimin khan Army Day pualin sipaite zahna a hlan.

PM chuan ram himna tura sipaiten huaisen taka an inpekna chu ramin a chhuang hle a ni, a ti. Indian Army hotu lu ber, Generel Bipin Rawat-a pawhin sipaite duhsakna a hlan bawk. Indian Army hian kum 1949-a Lieutenant Genreal KM Cariappa-a’n General Sir Francis Butcher hnen aṭanga India mi zinga army commander-in-chief hmasa ber nihna a lak ni, January 15-ah Army Day hi an hmang ṭhin a ni.

General Bipin Rawat-a chuan sipaite duhsakna a hlan rualin, lungawi lohna an neihte video hmanga thehdarh tawh lo turin a chah nghal. Tun hnaia sipai ṭhenkhatin an lungawi lohna, social media lama video an thehdarh chuan ramri-a duty mek, sipaite chungah nghawng ṭha lo tak a nei a ni, a ti. Sipaite tan chuan lungawi lohna an neih pawhin a thlenna tur hmun a awm a, an beisei anga hma lak a nih loh pawhin ama hnenah an thlen theih thu a sawi.

Sipai hotu chuan ramri himna tihbuai a nih chuan India chuan a theihna a hmang let ve dawn tih a sawi bawk. Ramri-ah boruak muanawm tak a awm an duh thu a sawi a, mah­se muanna tichhe zawnga chetna a awm chuan an thlir liam mai dawn lo tih a sawi. Army, Air Force leh Navy-te chu chona hrang hrang hma­chhawn tur a neihah thawhhona ṭha an neih a ngaih thu a sawi bawk a, hei hi hlawhtlinna tura thil pawimawh ber a ni, a ti.