Cabinet-in inhlawhfate tana housing scheme pawm
Prime minister Narendra Modi kaihhruaina hnuaia union cabinet ṭhukhawm chuan Nilaini khan nitina inhlawhfa, Covid-19 hri leng vanga mahni khaw lama hawte tan man tlawm zawka in luah tir an nihna tur, Affordable Rental Housing Complexes (ARHCs) scheme siam chu a pawm.
He scheme hi Pradhan Mantri Awas Yojana-Urban (PMAY-U) hnuaia sub-scheme a ni a, Union finance minister chuan May 14 khan he sub-scheme hi AtmaNirbhar Bharat Package a puan zingah khan a tel a ni. Ram chhunga Covid-19 hri leng vanga inkharkhirpna leh khuahkhirhna hrang hrang hman a ni a, heng vangte hian state danga nitina inhlawhfate chu an hna thawh tur a khaihlak phah a, mahni khaw lamah an haw hial a lo ngaih phah a ni. Heng inhlawhfate dinhmun hi sorkar laipui chuan hre rengin hna an hmuh theih nan leh ARHC kaltlanga man tlawm zawka in an luah theih nan hian ruahmanna hi kalpui a ni ta a ni.