West Bengal-a innekbuainaah mi paruk an thi

West Bengal, South 24 Parganas district-a Kochuberia-ah Pathianni zan khan Ganga Sagar festival hmang zo mipui pungkhawmte inpawngnekin, mi paruk an thi a, mi 35 in hliam an tuar bawk.

Sundarbans development minister Manturam Pakhira chuan, inpawngneknaah hian nu tar lam parukte chu thawhchham vangin an tlu a, damdawi-in panpui an nih hnuah an thin niin a sawi. Pakhira chuan Ganga luia inchiah zo, Kolkatta pana haw tuma intlar te chu lawng-ah chuang hmasak inchuhin an innekbuai ta niin a sawi.

Prime Minister Narendra Modi chuan West Bengal-a inpawngnek thleng leh, thi an awm chu pawi a tih chu a sawi a, thi chhungte chu cheng nuai hnih zela ral an nih tur thu leh, hliam tuarte pawh Rs 50,000 ṭheuh pek an nih tur thu a puang. Hliam tuarte chu an dam ṭhat thuai a duhsak thu a sawi bawk. Heng pawisate hi Prime Minister National Relief Fund (PMNRF) aṭanga pek an ni ang.

Makar Sankranti neih laiin hian kumtin Sagar thliarkar-ah Ganga Sagar festival hi buatsaih a ni ṭhin a, he hunah hian ramchhung hmun hrang hrang aṭangin Ganga lui-a inchiah turin an kalkhawm ṭhin. He thliarkar hi lawng hmang chauhin a kalpawh theih a, hei vang hian holy festival neih lai hian lawng chawlh hmunah mipui pungkhawm an tam thei hle.

Kuminah hian Ganga luia inchiah thianghlim hun hi kar kalta Zirtawpni zan aṭang khan neih ṭan a ni a, he hun hmang tur hian Sagar thliarkar hi mi maktaduai 1.6 velin an pankhawm a ni. Sagar thliarkar hi Kolkata aṭanga km 15 vela hlaa awm a ni a, he thliarkara Ganga lui leh Bay of Bengal tuipui inluanfin hmaa inchiah hi Hindu-te chuan vanneihna thlentuah an ngai a ni.