France-in Azhar-a firfiaka puan rawtna thlawp

India sorkarin United Nation-a Pakistan mi, Jaish-e-Mohammad pawl hruaitu Masood Azhar-a international terrorist-a puang tura a rawtna chu China chuan a block sak a, mahse France chuan India rawtna siam hi a thlawp thu a sawi thung.

Ni li cham tura India rama rawn zin, France Foreign Minister Jean-Marc Ayrault chuan China hi a hming sawilang kher lo mah se, a thiltih dan a dem thu a sawi. “Khawvel ram hrang hrangte chuan firfiakte kan doletna kawngah lungrual leh ang khata kan kal a ngai a ni” a ti.

Ayrault chuan Azhar-a pawl, JeM chu committee-in firfiak pawl list a siamah pawh telh a ni tawh tih sawiin, India-in an pawl hotu ber firfiaka puang tura a ngenna chu thil tihawm tak nia a ngaih thu a sawi.

Sorkar laipui chuan nikum February thla khan UN Security Council-a Sanctions Committee-ah Pathankot airbase beihnaa bultumtu ber, Azhar hi international terrorist-ah puang turin rawtna a thlen a ni. Mahse he rawtna hi China chuan chhuanlam siamin ṭum hnih a tikhawtlai a, nikum December thla khan a block zui a ni.