Khadi calendar-a PM thlalak dah turin PMO-ah dil lo

Kumina Khadi and Village Industries Commission (KVIC) calendar leh diary tihchhuahah, kum danga Mahatma Gandhi thlalak dah ṭhin chu thlakin, a aiah Prime Minister Narendra Modi-a thlalak dah a ni a, hei hi eptu party, official leh department staff tam takin an hrethiam lo hle.

Prime Minister Office chuan Khadi calendar-a PM Modi-a thlalak dah tur hian Prime Minister Office (PMO)-ah dil a ni lo a, phalna pawh an pe lo niin a sawi. PM ngei pawh a lawm lo hle nia sawi a ni bawk.

Official-te chuan public leh private company-te’n a hma pawhin PMO phalna nei loin PM Modi thlalak hi an lo hmang tawh ṭhin niin an sawi. Jio leh Paytm fakna atan pawh phalna nei loin PM thlalak hi an hmang tih an sawi.

KVIC official chuan Mahatma Gandhi thla aia Modi-a thlalak dah a nih chhan hi sawifiahin, Modi chu ram mipuite zingah a lar a, kuttah puan ngaisangtu a ni bawk a ni, a ti. Nikum October thla pawh khan Modi hian la herna tur, hmui 500 zet chu Ludhianaah a lo sem tawh a, a thiltih chawimawina kawng khat atan calendar-a a thlalak dah hi an rel ta tih a sawi.