UP-ah Congress leh SP thawkdun dawn Akhilesh Yadav-an SP symbol a chang

Uttar Pradesh assembly inthlan neih turah rorellai, Samajwadi Party leh Congress party chu an thawkdun dawn.

Congress hruaitu hlun, Ghulam Nabi Azad chuan assembly inthlanah party pahnihte an thawhdun tur thu hi nimin khan a sawichiang a, SP hruaitu leh UP Chief Minister nilai Akhi­lesh Yadav-a hruaina hnuaiah an inthlan hi an hmachhawn dawn tih a sawi.

Party pahnihte thawhdun dan tur kimchang, seat insem zat turte pawh puan chhuah thuai a ni dawn tih Azad chuan a sawi bawk. Party pahnihten thawhdun an remtih tak avangin Congress party-in CM nominee atana a lo hual, Sheila Dikshit-i pawhin inhnuhdawh a remtih thu a sawi.

Bihar-a party lian pathum, JDU-RJD-Congress party te thawkhoin Grand Alliance dina ṭangrual sorkar an din ang kha UP-ah hian din ve tumin Samaj­wadi Party, Congress leh RLD chuan thawhho tumin hma an la mek a ni.

Assembly seat 403 awmna, Uttar Pradesh assembly inthlan hi thawh sarihah neih a ni dawn, February 11-ah bial 73 ah inthlan thawh khatna hi neih a ni ang a, February 15 (67 seats), February 19 (69 seats), February 23 (53 seats), February 27 (52 seats), March 4 (49 seats) leh March 8 (40 seats) ahte vote thlak a ni ang.

Hetihlai hian Samajwadi Party chhunga buaina awm avanga party symbol inchuh chungchangah, Election Commission chuan Thawhṭanni khan thutlukna siamin, SP symbol ‘cycle’ lem chu Akhilesh Yadav-a pawl lam hnenah a pe.

SP hi an party dintu zinga mi leh hruaitu lu ber, Mulayam Singh Yadav leh a fapa, CM nilai Akhilesh Yadav-a lamṭang pawl hnihah an inṭhen a ni. Mahse EC chuan Akhilesh-a te lam chu Samajwadi Party ziding zawkah pawmin, an party symbol pawh an hman turin a ti ta a ni.

EC chuan a thutlukna siam chungchang a sawifiahnaah, MLA, MLC, MP, National Executive member leh National Convention palai zingah Akhilesh Yadav-a thlawptu lam hi an tam zawk daih a, hei bakah hian an party chhunga pawl leh legislative wing-te pawhin Akhilesh-a lam hi an ṭan zawk a ni, a ti. Akhilesh-a lamtangten affidavit an thehluh­ah, an party MLA 228 zinga 205, MLA 68 zinga 56, MP 24 zinga 15, National Executive member 46 zinga 28, Nationa Convention delegate 5731 zinga 4400 chuan Akhilesh an thlawp thu an tarlang. Hei vang hian Commissoin chuan Akhilesh Yadav-a kaihhruai lam pawl hi Samajwadi Party zidingah a pawm a, party symbol pawh hi inthlannaah an ni lam hian an hman a remtih sak ta a ni.