Jallikattu khap duh lotu mi 200 man

Tamil Nadu-a Pongal festival hmannaa telh ṭhin, infiamna an ngaihhlut tak pakhat, bawng an chaih ṭhin, Jallikattu chu ransa tihduhdahna rawngkai nia Supreme Court-in a khap avangin state chhung hmun hrang hrangah lungawi lohna lantir chhunzawm zel a ni. Nimin thleng khan lungawi lohna lantir zing­a mi 200 chuang man an ni tawh.

Madurai district-a Alanganallur-ah nimin khan nawrh huaihawt thar leh a ni a, state chhung hmun hrang hrang aṭangin an kalkhawm a ni. Jallikattu chu Pongal festival peng pawimawh tak a nih avangin phalsak turin an phut.

Kum 2014 khan Supreme Court chuan Jallikattu hi a khap a, mahse a hnuah sorkar laipui chuan khuahkhirh chin neiin hman a phalsak. Hei hi animal rights activist-ten Supreme Court-ah an khing let a, court hian thutlukna a la siam lo.

Khap a nih chungin hmun ṭhenkhatah chuan Jallikattu sport hi neih luih a ni a, Thawhṭanni khan bawng chal pali chu infiamna atan hian hman a ni a, mahse police-ten an tihtawp sak a ni.