HP Assembly gate-ah Khalistan flag tar CM-in chhui chiang turin thupek tichhuak

Himachal Pradesh legislative assembly luhna gate pui berah nimin khan Khalistan flag tar a ni a, assembly complex bangah Khalistan movement thlawpna thute ziah a ni bawk.

Kalsitan movement hi Sikh inlakhran duh pawlten Sikh hnam ho puala Punjab biala inrelbawlkna hran, Kalistan din tumna a ni. He ram din an tumna hian India rama Punjab bakah Pakistan-a Punjab bial pawh a huam a ni.

Khalistan flag tarna hmun hi Kangra district-a Tapovan hmunah a ni a, Dharamsala-a assembly complex hi December-a Assembly winter session neihna atan chauh hman a ni ṭhin.

Khalistan flag hi lak thlak nghal a ni a, chief minister Jairam Thakur chuan thil awmdan chu chhui chiang turin thupek a tichhuak nghal bawk.

Himachal BJP chuan hemi chungchang hi an twitter-ah, "Himachal Pradesh chief minister chuan mi dawihzepten Dharamsala-a assembly complex-a Khalistan flag an lo tar hi a dem takzet a, chhui chiang turin thupek a tichhuak nghal a ni. Police-te chuan he thil titute hi an man thuai ang," tiin an tarlang. He thil titute hi Himachal mipuite chuan an ngaidam thei lo ang, a ti bawk a ni.

Kangra police chuan FIR an ziaklut nghal a, DGP Sanjay Khandu chuan thil awmdan chhui chiang turin member paruk awmna Special Investigation Team (SIT) a din nghal a ni. SIT-te hi rang taka chhui hna thawk nghal tura tih an ni a, state leh central intelligence agency-te pawh pe pawp turin hriattir an ni.

Chief Minsiter Thakur chuan state dangte nena an inrinaa venhim hna thawh dan chu ennawn a ni dawn tih a sawi. Hei hi Kangra SP-in Assembly Complex-a thil thlengah hian Punjab lam aṭanga khualzinte an inhnamhnawih nia a rin thu a sawi hnuah a sawichhuak a ni.

Himachal Pradesh-a thil thleng chungchangah Aam Aadmi Party (AAP) chuan BJP sorkar chu sawiselin, venhimna lamah a hlawhchham a ni, a ti. Delhi deputy chief minister, AAP hruaitu Manish Sisodia chuan, Dharamsala-a assebly building gate-a Khalistan flag tar chuan BJP sorkarin ram venhimna lam leh, state mipuite humhalhna kawnga a hlawhchham zia a tilang chiang hle a ni, tiin a sawi.