Rahul Gandhi-a'n LPG man tihsan sawisel

Congress party hruaitu, Rahul Gandhi chuan kar liam ta Inrinnia domestic liquified petroleum gas (LPG) cylinder Rs 50-a tihsan a nih leh chungchangah nimin khan central-a BJP sorkar chu na takin a sawisel a, "Congress chauh India rama mirethei leh middle class chhungkaw ngaihtuaha rorelsaktu a ni.Hei hi kan economic policy-a kan thupui ber a ni," a ti.

Rahul Gandhi chuan a twitter-ah BJP sorkar aia UPA sorkar laia dinhmun a ṭhat zawk dante a khaikhin bawk a ni. Kum 2014,May thlaah eirawngbawlna gas cylinder pakhat man chu Rs 410 niin, kum 2022-ah chuan Rs 585.50 zetin tihpun a ni a, cylinder man hi Rs 999 a tling tawh a ni, a ti. Congress rokarah khan subsidy, Rs 827 pek a nih laiin BJP sorkar chuan subsidy a pe lo a, "Hmana cylinder pahnih man kha tunah chuan pakhat man a ni tawh a ni." tiin a tarlang.

Congress hruaitu dang, Randeep Surjewala pawhin LPG man tihsan chungchangah sorkar laipui chu a sawisel bawk a, "Subsidised cooking gas man hi a let 2.5 in ato tawh a, tunah chuan mirethei zawk leh middle-class chhungkaw tan chuan lei ngaihna a awm tawh lo a ni," tiin kum 2014-a a man nen khaikhin chunga LPG man tihniam leh turin sorkar a phut.

Kar liam ta Inrinni khan eirawngbawlna gas man hi Rs 50-a tihsan leh niin, hei hi thla hnih pawh tling lo chhunga ṭum hnih a man tihsan a nihna a ni. A man tihsan hnuah domestic LPG cylinder, kg 14.2 man hi Delhi-ah bur khat Rs 999 niin, Navsari (Gujarat)-ah Rs 1,008.50, Ludhiana (Punjab)-ah Rs 1,026, Chennai (Tamil Nadu)-ah Rs 1,015.50 leh Patna (Bihar)-ah Rs 1,098 an kai tawh bawk.