UP leh Punjab-ah pawisa, zu, ruihhlo ṭhahnem tak man
Election Commission-in a ruat, surveillance and expenditure monitoring team-te chu state assembly inthlanna neihna tur state panga-ah ngawrh takin an duty mek a, pawisa fai cheng vaibelchhe 64 chuang bakah, zu leh ruihhlo cheng vaiblechhe 8 man hu an man tawh.
Monitoring team-in voter-te thamna atana hman tum nia hriat sumfai an man zinga cheng vaibelchhe 56.04 hi Uttar Pradesh state chhunga man a ni a, Punjab-ah ruihlo, heroin leh a dang cheng vaibelchhe 1.78 chuang man hu an man bawk. Goa-ah ruihhlo cheng nuai 16.72 leh Manipur-ah cheng nuai 7 man an man tawh bawk a ni.
Vote zawnna atana semchhuah tum zingah, Uttar Pradesh-ah zu litre nuai 1.98 chuang man niin a hlut lam hi cheng vaibelchhe 6.06 a ni a, Punjab-ah litre 10,646, chengnuai 17.54 hu an man bawk.
Goa leh Uttarakhand-ahte pawisa leh zu man a awm lo a, Manipur-ah zu an man lo a, UP-ah ruihho man a la awm lo bawk.
EC chuan inthlan vuakveta sum dik lo leh ruihtheih thil leng ṭhin veng leh endik turin, central observer-te bakah election expenditure observer 200 a ruat belh a ni.
Uttar Pradesh, Punjab, Goa, Uttarakhand leh Manipur-ah hian February 4 - March 8 inkar chhungin assembly inthlan hi neih a ni dawn a, March 11-ah vote tlate chhiarin result puan a ni ang.