Court-in Salman Khan thiam a chantir

Jodhpur court chuan lemchan thiam, Salman Khan chu kum 19 liamtaa sazuk chi khat, blackbuck a pelnaa licence thi tawh hmanga silai a keng nia puhna thubuaiah thiam a chantir.

Salman Khan hian ramsa pela puhna kaihhnawihah thubuai pali a nei a, blackbuck pahnih kaphluma puhna thubuai pahnih a la nei. Hetihlai hian Rajasthan High Court chuan sakhi chi khat, chinkara kapa puhna thubuai pahnihah thiam a lo chantir tawh bawk.

Nimina Chief Judicial Magistrate Dalpat Singh Rajpuroti-a’n a thubuai aṭanga a fihlim thu a puan lai hian kum 51 mi, Salman Khan hi court-ah a farnu, Alvira nen an awm a ni.

Salman Khan hi kum 1998, October 1-2 khan Johdpur bul, Kankani-ah a silai licence thi tawh hmang hian ramsa a pel nia puh a ni a, Arms Act section 3/25 leh 3/27 hnuaiah thubuai siamsak a ni. Mahse Khan chuan court-a a inlan hnuhnun ber ṭum, kum 2016 March 10 khan an puhna lakah a fihlim thu leh, forest department lamin dik lo taka an puh thu a sawi.

Prosecutoin counsel BS Bhati chuan Salman Khan-a thiam chantirna hi sessons court-ah an khinglet dawn tih a sawi.