Hnathawk ṭha lo senior officer pahnih pension-in chhuahtir
Prime Minister Narendra Modi-a’n sorkar officer-te tana dan khauh tak kenkawh a nih tur thu a sawi denchhenin, senior police officer pahnih chu hna an thawh ṭhat tawk loh avangin pension-in chhuah tir an ni.
‘All India Death Cum Retirement Rule’ hmangin Raj Kumar Devangan, 1992 batch Chhattisgarh officer leh Sheel Chauhan, 1998 batch officer of Arunachal Pradesh-Goa-Mizoram and Union Territory-te chu an service tawp hmain pension-a chhuah tir an ni. He dan hnuaiah hian officer-te hnathawh dan chu kum 15 leh 25 hnuah ennawn ṭhin a ni a, an hnathawh dan hian duhthu a sam loh chuan a ṭul angin an chungah action lak theih a ni.
He dan hi a siamna rei tawh mah se, hman a ni khat hle. Dan hnuaiah hian officer, an hna thawk ṭha tawk lo nia ngaihte chu mipuite tana a ṭhat zawk nan chawlhtir mai tur tih a ni.
PM Modi-a kaihhruai sorkar chuan he dan hi khauh taka kalpui a tum thu a sawi a, NDA sorkar a din hnuah officer 60 dawn chu he dan hmang hian ban leh pension-a chhuah tir an lo ni tawh a ni.
Home Ministry official chuan hna chak zawk leh ṭha zawka kalpui a nih theihna turin officer hna thawk mumal lo te chu chawlhtir an ni tih a sawi a, mahse pension tir an nih hian hamṭhatna an dawn turte pawh pek tel vek an nih avangin hremna anga ngaih theih a ni lo tih a sawi.