Delhi-a Shaeen Bagh-a demolition drive kalpui tum dodal
BJP rorelna, South Delhi Municipal Corporation thupek angin, nimin khan Shaheen Bagh-a dan loa structure din nia sawite tichhe turin bulldozer tirh a ni a, mahse AAP MLA Amantullah Khan hoa tualchhung miten civic body hmalakna duh lohna lantira nawrh an lo huaihawt vangin bulldozer pawh engmah ti thei loin a kir leh a ni.
AAP MLA Khan chuan a hmain dan loa structure awmte chu an lo tihchhiat vek tawh thu sawiin, tunah hian dan loa ding engmah a awm lo, a ti. Tichhiat tur dang a awm tawh loh avangin bulldozer hna thawh tur pawh a lo dang tih a sawi.
South Delhi Municipal Corporation standing committee chairman, Rajpal chuan municipality chuan a hna chu a thawk dawn tih sawiin, "Kan worker leh official-te pawh inpeihin, bulldozer te pawh buatsaih vek a ni. Dan loa thil dinte chu tihchhiat zel an ni ang," tiin a lo sawi a ni. South Delhi mayor Mukesh Suryan chuan an hmalakna hi Delhi mipuite pawhin an thlawp niin a sawi bawk.
Delhi BJP chief Adesh Gupta chuan April thla khan civic body mayor hnenah hian complaint thehlutin, Rohginya, Bangladesh leh sorkar dodaltu, dan loa awmte chu hnawtchhuak turin a lo ngen a ni. Hemi hnu hian mayor chuan Shaheen Bagh-a demolition drive kalpui tur hian a ti ta a ni.
Lungawi lohna lantirtute chuan Shaheen Bagh-a bulldozer tirh luh hi lo dangin hna thawk thei lo turin a kalna turah an lo ṭhukhawm a ni. Pungkhawmte chuan BJP rorelna ,South Delhi Municipal Corporation leh sorkar laipui laka an lungawi lohna thute an aupui bawk. Nawrh huaihawta pungkhawmte vang hian Shaheen Bagh, Kalindi Kunj, Jaitpur, Sarita Vihar leh Mathura Road-ahte traffic a jam nasa hle.
Delhi BJP hruaitu Gupta chuan Congress leh AAP chu Shaheen Bagh-a dan kalha thil siam tihchhiatna tur dodalah leh, Rohingya leh Bangladesh mite thlawpah a puh.
Supreme Court-in CPI-M petition pawm duh lo
Communist Party of India-Marxist chuan Shaheen Bagh-a demolition drive kalpui tum chungchangah nimin khan Supreme Court-ah petition thehluh a tum a, mahse court chuan a lo pawmsak duh lo a, Delh High Court-ah thlen zawk turin a ti.
Supreme Court chuan he thil thleng chungchangah political party-te inrawlh chu a duh lo tih sawiin, a tuartu dik takte chauh an rawn zualkoin a inrawlh chauh dawn tih a sawi. Hei vang hian CPI-M pawh a petiton thehluh tum chu sut turin a ti a ni.
Political party-ten an phut leh an duhdan a nih vang ni loin, dan bawhchhiatna a awm a nih chuan Supreme Court chuan a inrawlh dawn tih a sawi nghal bawk. High Court-ah pawh kal hmasa lo a, Supreme Court-a an thlen nghalna chhan chu CPI-M hi a zawt nghal bawk.