HP Assembly gate-a Khalistan flag tartuah SFJ inchhal

Himachal Pradesh-a Dharamsala-a Legislative Assembly main gate-a Khalistan flag intar leh, bang-a thu ziakte chu an tih a nih thu Sikh inlakhan duhtu pawl, 'Sikhs for Justice (SFJ) chuan nimin khan an sawi.

SFJ hian nimin khan video clip tichhuakin, Khalistan flag tar tur hi Sikh activist-te an thawn tih an sawi a ni.

Video-ah hian SFJ general counsel Gurpatwant Singh Pannun thusawi tilangin,' Dharamsal-a Khalistan flag tar hi Himachal Pradesh chief minister Jai Ram Thakur hnenah Himachal Pradesh hi Khalistan Referendum kaltlangin lak let a ni dawn a, Punjab-ah a bet leh dawn tih hriattirna a ni," a ti.

SFJ hian June 6, Operation Bluestar kum 38-naah hian Himachal Pradesh-ah Khalistan Referendum chungchangah vote lak a ni dawn tih a tarlang bawk.

Gurpatwant Singh Pannun hi India sorkar dodal zawnga a chet avangin Unlawful Activities (Prevention) Act hnuaiah thubuai siamsak a lo ni tawh a, kum 2019 khan an pawl hi dan pawnah hnawl a ni tawh bawk.

Himachal Pradesh police-te chuan SFJ-ten Khalistan Referendum chungchanga vote lak an tum tih an sawi avang venhimna lam pawh an tikhauh nghal a, inter-state boder-te pawh kharin, sorkar building hrang hrangah pawh vengtu dah belh an ni bawk.