Punjab-ah candidate 1,941-in hming pe lut

Punjab state assembly inthlan, February 4-a neih tura chuh tumte tana hming pek luh theih hun chu Nilaini khan a tawp a, assembly bial 117-a inthlanna neih tur atan hian candidate 1,941 in nomination an thehlut.

Nomination thehluh hun tawp ni, Nilaini hian candidate 1,040 in hming an pe lut a, an zingah hian Congress party zawm thar Navjot Singh Sindhu, state Congress hotu Amarinder Singh, Aam Aadmi Party hotu Bhagwant Mann-te pawh an tel. Navjot Singh hi Amritsar East bialah a ding dawn a, Bhagwant Mann hian Jalalabad-ah a chuh dawn a ni. Amarinder Singh chuan Lambi bialah Chief Minister nilai Parkash Singh Badal a khing ang.

Punjab assembly inthlan neih turah hian rorellai, Shiromani Akali Dal leh a thawhpui BJP-te chu, Aam Aadmi Party leh Congress party-te nen an inbeih tawk hle rin a ni. SAD hian seat 94 changin, a thawhpui BJP hian seat 23-ah a chuh dawn a ni. Congress leh AAP erawh chuan party malin inthlan hi an hmachhawn dawn a ni.

Chief Electoral office thupuangtu chuan nimin khan nomination paper lutte hi enfiah a nih thu a sawi a, inhnukdawk duh tan Inrinni thleng hun hawn a ni.

Punjab-ah hian mihring maktaduai 28 chuang awmin, vote nei in register maktaduai 19.7 an awm a, an zinga maktaduai 10.4 chu mipa niin, hmeichhia vote nei maktaduai 9.31 an awm. Vote nei zinga 53% chu ṭhalai kum 18-39 inkar an ni.

Rorellai, Shiromani Akali Dal hotu leh Chief Minister nilai Parkash Singh Badal chu kum 89-a upa a ni tawh a, Congress-in CM tura a hmatheh Amarinder Singh pawhin March thla khian kum 75 a tling ang.