Zakir Naik-a NGO-in Rs vbch 100 investment ti

National Investigating Agency (NIA) chuan Zakir Naik-a NGO, Islamic Research Foundation chuan real estate sumdawnna lamah cheng vaibelchhe 100 investment a lo ti niin a tarlang.

NIA hian Zakir-a’n Indian bank account 78 a neih mekte chu a chhui chiang mek tih a sawi.

Ministry of Home Affairs (MHA) chuan nikum khan Unlawful Activities Prevention Act (UAPA) hnuaiah kum nga chhung atan dan pawnah a lo hnawl tawh a ni. Hemi hnu hian NIA chuan Naik hi sakhaw inkara inhuatna thlen thei zawnga thu sawiah puhin thubuai a siamsak a, a office, chenna in, Peace TV office leh hmun dang te a dapsak bakah, a NGO bank account hi khawih chet theih lohin a dahsak a ni.

Nikum July 1-a Bangladesh khawpui, Dhak-a firfiakten cafe an beih hnuah Naik hming hi hriat lar a ni zui ta a ni. Pawikhawihtu firfiak zinga pakhat chuan Naik-a thusawiin a hneh avangin pawikhawihna hi an thlen zui niin a sawi. He thil thlen hnu hian Naik hi India ramah a la rawn kir lo a, Africa leh Middle East-ahte thuhrilin a vak kual a ni.