CBI-in Delhi Deputy CM chhui dawn

Central Bureau of Investigation (CBI) chuan Delhi Deputy Chief Minister Manish Sisodia leh midangte chu Aam Aadmi Party (AAP) sorkarin social media campaign, ‘Talk to AK’ a kalpui dan dik tawk lo nia sawi chungchangah a chhui chiang dawn.

Delhi sorkar-a Vigilance Department chuan social media campaign kalpui a nih danah thil dik tawk lo a awm nia sawiin, complaint hi a thehlut a ni.

Complaint thehluhah hian Delhi sorkar chuan ‘Talk to AK’ (Talk to Delhi Chief Minister Arvind Kejriwal) campaign kalpuina tur tihlarna atan hian public relation company consultant a ruai a, hemi atan hian cheng vaibelchhe 1.5 a ruahman niin a tarlang. Principal Secretary-in a dodal chungin, sorkar chuan he rawtna hi a kaltlangpui a, sum ruahmante pawh consultant hian sorkar thil tum kalpuina tur hian a hmang niin a sawi.

CBI chuan hemi chung­chang chhui tur hian thubuai a ziaklut a, Sisodia leh midang inhnamhnawiha puhte chu chhui chian an ni ang. Hemi chunchang hi Sisodia chuan a twitter-ah na takin a chhang let nghal a, Prime Minister Narendra Modi-a ruahmanna vek nia puhin, CBI chu anmahni beihna hmanruaa hmangah a puh.