CBI director thar atan Alok Kumar Verma ruat

Delhi Police Commissioner Alok Kumar Verma chu Central Bureau of Investigation (CBI) director thar atan ruat a ni.

Alok Kumar Verma hi 1979 batch Indian Police Service officer, Arunachal Pradesh-Goa-Mizoram and Union Territory (AGMUT) cadre a ni. CBI director hi kum 36 police officer hna a chelh chhunga a post 24-na tur a ni. Verma hi kumin July 31-a pension tur a ni a, mahse CBI hotu atana ruat a nih tak avang hian, he hna hi kum hnih chhung a chelh ang.

CBI director thar ruat tur chungchang hi hun eng emaw chen tihfel loha a awm avangin Supreme Court chuan sorkar laipui hnenah, January 20-a ruat fel turin a lo hriattir tawh a ni. Verma hian Delhi police hotu hna hi thla 11 chhung a lo chelh tawh a, CBI hotu atana ruat a nih tak avangin sorkar chuan amah thlaktu tur a ruat fel thuai a ngai dawn a, 1984 batch IPS officers of Union Territories cadre Deepak Mishra leh Dharmedra Mukar-te chu amah thka tura sawilan zingah an tel.

Nikum December 2-a CBI director aṭanga Anil Sinha a chawlh hnu khan, a post hi hnawhkhah lohin thla khat chuang a awm hman a ni. Hemi chhug hian Gujarat cadre IPS officer Rakesh Asthana chuan interim director hna hi a lo chelh lailawk a ni.

Prime Minister Narendra Modi-a kaihhruai member pathum awmna committee chuan CBI hotu thar tur hi a thlang a ni. Selection committee-ah hian Congress hotu Mallikarjun Kharge leh Chief Justice of India pawh an tel. Kharge chuan committee-in CBI hotu thar atana a nominee hi a thlawp lo nia sawi a ni a, mahse member tam zawkin an thlawp avangin kaltlangpui a ni.

CBI director thar atana hming chhawpchhuah, IPS officer 45 hming chu Prime Minister Office-ah thawn a ni. Director atana thlanchhuah, Verma hi police officer senior ber zinga mi a ni a, Tihar jail-ah director general hna leh, Mizoram police hotu lu ber hna te a lo chelh tawh. Kum 2007 August aṭang a, 2008 December chhung khan Delhi Police crime branch-ah special commissioner a ni.